مونولوغ المرزوقي

تي خلي يحكيو مثلما يريدون و كيما يقول المثل الكلاب تنبح و القافلة تسير يكفيني فخرا انني أول رئيس منتخب في تاريخ تونس

.وأيضا أول رئيس منتخب بشفافية و من قبل الشعب في تاريخ الدول العربية

هذا هو الي سيذكره التاريخ و سوف لن يذكر انني اعلنت ترشحي قبل منروح الى تونس و جروح العباد مازالت لم تندمل وأنني

وصلت للمجلس تأسيسي بأفضل البقايا و بأني كنت في سباق وحدي من أجل هذا المنصب و بأني لا أملك الكثير من

.الصلاحيات

لازمني نخمم في المستقبل توا و نتلهى بروحي شويا خلي نعطي الوهرة  و الكريزما بتاع الرئيس و نعمل فازات ترجع حب ناس ليا برشة كرهوني على خاطر تحالفت مع النهضة اما برجولية مانيش نادم  على التحالف هذا مادام نجح وهاني شايخ نبرطع في القصر شكون كيفي ؟ اكا لصلع نجيب شابي هو و المسمامة مايا و لا حمة الهمامي مكبش في الشيوعية حاسبها مازالت تقظي في وقتنا اهوكا حصلو صبع الوسط لاعبينا بتاع مبادئ  و قيم اخي مازالت الخزعبلات اذيكا توصل لازمك تكون ذيب و تعرف كيفاش تكمبس باش

.توصل للهدف بتاعك

 اما الي مقلقني هو حكاية المؤقت الي كبشولي فيها كي قرقنة و زيد يحبو الدستور يكمل في عام مانيش عارف كيفاش باش نعقبها عليهم المرة هاذي. في حملة الإنتخابية نومتهم بحكاية البوليس السياسي و القطع مع الماضي و الي نحنا حزب خالي من المال السياسي بينما الفلوس تجي تحت حس مس من عند  شقرون و بعد حتى انا فرحت بيه و حطيتلو بنتو مستشارة من جملة المستشارين البندارة المدورهم بيا هوما صحيح برشا 

.اما واحد لازم يرضي لحبيبات و القفافة الجدد كيما منصر اهوكا تبارك الله عاطي ما عندو ههههههههه 

الحكايات الشعبوية بتاع قبل الإنتخابات معادش تصلح لبستلهم برنوص اخي لعباد شاخت عليا و عملوني تكركيرة قلت هاني باش نبيع القصورات باش نخدم البطالة كيف كيف مخطفتش تقولش عليه الشعب تبدل وينهم الدغف لإنتخبوني وليتشي نمجد في بورقيبة باش يحبوني مانيش فاهم شنوا الي عجبهم فيه كان على الصلعة انا بيدي اصلع كان على قصر القامة كيف كيف القراية حتى انا قاري البرة و واصل خير منو دكتور في الإسهال الي قلك ... و موش بركة يحبوه هو ! يحبو ريحة ريحتو اخي مالا علاش عاجبهم السبسي المقص تقولش عليها مبعوث بالذمة باش يمررلي حياتي والي زاد نرفزني بلي نتاكي فيه هو باعثني طول و عرض اما اهوكا لعبولو اللعبة باش يكركروه للمحاكم على قظايا اليوسفيين و التعذيب مالا كيفاش ؟ هذا هو وقتنا وقت اليوسفيين

.شماتة في جماعة بورقيبة اك 0 منعرفش شنوا

من شيرة اخرى كي تجي تشوف تلقاها عكست معايا شويا نعرف روحي عتبة و وجهي احرف اما موش للدرجة هاذي ثلوج و برد و فيضانات مشيت عملت طلة على شمال الغربي من غدوة بوسالم قريب لهزها الماء ...ربي يقدر الخير يمشيش يضربنا زلزال يمحينا

.من الخريطة و ترصيلي بعيد الشر منغلقش عام في الرئاسة يا لطيف الطف

حاصيلو توا حسب مانشوف في الفايسبوك فما زوز مواضيع نجم نحكي فيهم و ينجمو يبرقشولي صورتي و الي هوما موضوع السلفيين و موضوع سوريا هاذوما الي باش ندز بيهم فازتي لا غلاء الأسعار لا فلفل لا فقوس اذيكا مشكلة حمادي خلي يكمل يتحشالو و يضيع فيها على قاعدة  نهار كامل دازها يضحك و يعنق و اخر ما عمل يشحت في السعودية باش يعطونا فلوس و الكركدن الي معاه قللهم مانش باش نقلقو السعودية و نطلبو منها ترجعلنا بن علي جات في وجوهم هوما خير. 

السلفيين بتاع وذني ماني زلقتلهم الجراثيم و اهيكا عملت بوز و حتى الإعتذار نرمال المهم الكلمة خرجت و زيد الوليّد عبو عطاهم الحس قال الي هوما ما شاركوش في الثورة و قت الي لعباد تناضل هوما في العراق و تجي تشوف حرقانهم للمقر بتاعنا جاء في الصلاح كان يزيدو شعلولنا مقر أخر تولي حلوة ياسر. و هاني كملت طلبت من جماعة المجلس باش يعملو قانون يجرم التكفير و سمعتها للناس الكل باش كان عملوه انا حشيتو و كان ما عملوهوش كيف كيف انا حشيتو و تحشى للمدبية المهم ديما نجبد روحي

.من المشاكل

قعدت حكاية سوريا بعد ما طردو السفير و لسقوهالي تي انا مافهمتش من شيرة يقولو الي انا معنديش صلاحيات تي حتى المفتي منجمش نعينو و بعد يقولو شبيه طرد السفير تقولش عليا انا لاهي بسوريا و لا براس لمبوط اما هاني في مؤتمر صوحاب سوريا قلتلهم لا للتدخل العسكري و لا للتسليح و لازم حل سلمي و دغف عجبتهم الفازة هههههه قالو حل سلمي هاو وجهي كان خرج بشار و برهان غليون يحلم باش يولي كيفي رئيس هو صاحبي في باريس اما ربي يعينو هههههههه الحاصيلو توا لازمني ديما ندك للنهضة شعب بدا يفيق بتلوعيب بتاعها و الواحد ياخو حذره لا يمشي معاهم في حنديرة بالنسبة لصطوفة هههههههه سخفني لعزا حالتو تبكي الحجر ربي يفرج عليه اهوكا لا يبل لا يعل ما لقيت ما نكمبسلو  في الأول يستبندى وقال أنا نحب نشد رئيس الجمهورية

.ههههه في لخر ولا نهار كامل و هو يضرب بمطرقة موش كيفي نضرب نصرع.

... يا ولدي يعطيني دودة زايد مع المخ الي عندي 

... ابببببببببببب شنوا هذا !! ملا هيفى وهبي و ملا كليب ايا بره اكاكا بوس الواوا خلي الواوا يصح 

.اش مجيبو هذا توا اوووووووه موش قال باش يجي لعشية

                           ... المرزوقي : عسلامة عسلامة عسلامة ايا تفضل اقعد  يا سي

.النهاية